hamen lapakti hava par savar le aa.i
koi to mauj thi dariya ke paar le aa.i
vo log jo kabhi bahar na ghar se jhankte the
ye shab unhen bhi sar-e-rahguzar le aa.i
ufuq se ta-ba-ufuq phailti bikharti ghaTa
ga.i ruton ka chamakta ghubar le aa.i
mata-e-vada sambhale raho ki aaj bhi shaam
vahan se ek naya intizar le aa.i
udaas shaam ki yadon bhari sulagti hava
hamen phir aaj purane dayar le aa.i
na shab se dekhi ga.i barg-e-aḳhiri ki thakan
ki buund os se us ko utaar le aa.i
main dekhta tha shafaq ki taraf magar titli
paron pe rakh ke ajab rang-zar le aa.i
bahut dinon se na so.e the ham aur aaj hava
kahin se niind ki ḳhushbu udhar le aa.i
vo ik ada ki na pahchan paa.e ham ‘bani’
zara si baat thi aafat hazar le aa.i
Leave a Reply