tujh ko socha to kho ga.iin ankhen
dil ka a.ina ho ga.iin ankhen
ḳhat ka paḌhna bhi ho gaya mushkil
saara kaghaz bhigo ga.iin ankhen
kitna gahra hai ishq ka dariya
is ki tah men Dubo ga.iin ankhen
koi jugnu nahin tasavvur ka
kitni viran ho ga.iin ankhen
do dilon ko nazar ke dhage se
ik laḌi men piro ga.iin ankhen
raat kitni udaas baiThi hai
chand nikla to so ga.iin ankhen
‘naqsh’ abad kya hue sapne
aur barbad ho ga.iin ankhen
Leave a Reply