seema-sharma-meeruthi

Mere Khaton Ko Jalane Se Kuchh Nahin Hoga

mere khaton ko jalane se kuchh nahin hoga

hava men raakh udane se kuchh nahin hoga

samajhne vaale to dil ki zaban samajhte hain

mohabbaton ko jatane se kuchh nahin hoga

sitam-zarifi rahi vaqt ki jo dil tuuta

kisi pe dosh lagane se kuchh nahin hoga

nai udaan ki khatir paron ko tol zara

qafas men shor machane se kuchh nahin hoga

koi to tiir nishane pe thiik se pahunche

hava men tiir chalane se kuchh nahin hoga

nae gulon ko khilao dil-e-zamin pe tum

dil ye kabab banane se kuchh nahin hoga

nai umiid nae raste talash karo

hamesha marsiya gaane se kuchh nahin hoga

badan se ruuh nikal bhi chuki hai ab hamdam

fuzul ashk bahane se kuchh nahin hoga

zaban se baat kai sach nikal gai ho gar

bahane laakh banane se kuchh nahin hoga

tumhare jaane se patthar men Dhal chuki ‘sima’

tumhare laut ke aane se kuchh nahin hoga

More Poems

Leave a Comment