Usha Bhadoriya
ek ashna akasr paas se guzarta hai
mujh pe meri sachcha.i ashkar karta hai
kis qadar haTela hai tera be-zaban saaya
jism ki tarah akasr ruuh men utarta hai
aap kis liye mujh ko dekhte hain hairat se
aadmi mohabbat men kuchh bhi kar guzarta hai
kya ḳhabar ye basti hi andhiyon men uḌ jaa.e
ik parinda par apne kholne se Darta hai
tere naam ke saa.e rakh ke apne honTon par
sirf main bikharti huun tu kahan bikharta hai
ik qarib ka rishta pherta hai jab nazren
aadmi nahin marta e’tibar marta hai
be-zaban lakiren hain na-murad ḳhake hain
dekhna hai ab in men kaun rang bharta hai
ḳhauf qurbaton ka bhi ḳhauf faslon ka bhi
zindagi ka har lamha Dubta ubharta hai
jab tumhare baare men sochti huun main ‘usha’
asman se dil men nuur sa utarta hai
Leave a Reply