Hidayatullah Khan Shamsi
mire shane pe rahne do abhi gesu zara Thahro
bikhar jaane do apne jism ki ḳhushbu zara Thahro
adhura chhoḌ kar jaao na ye qissa mohabbat ka
chhanakte hain abhi arman ke ghunghru zara Thahro
sukun-e-qalb ki ḳhatir shab-e-furqat main chumunga
bana lene do tasvir-e-lab-o-abru zara Thahro
miri rag rag men janan bhar gaya hai nasha-e-qurbat
utar jaa.e tumhare lams ka jaadu zara Thahro
ye mausam ka taqaza aur bhigi shab ki hasrat hai
badalna ishq men hai aḳhiri pahlu zara Thahro
kaleja shaq hua jaa.e bichhaḌne ke tasavvur se
mohabbat dil men karti hai ab ha-o-hu zara Thahro
ravan hai ḳhuun ka dariya miri ankhon se ai ‘shamsi’
abhi raqsan hai dil men dard ka jugnu zara Thahro
Leave a Reply