Niyaz Sultanpuri
nazar se ho ke vo dil men utarna chahta hai
phir is ke ba.ad lahu men bikharna chahta hai
ḳhabar karo ye siyah-rat ke asiron ko
sahar qarib hai suraj ubharna chahta hai
jo raushni-o-mohabbat ka isti.ara hai
usi parind ke vo par katarna chahta hai
nigar-ḳhane se kahiye zara sanbhal ke rahe
vo aa.ine ke muqabil sanvarna chahta hai
zamin se kaT ke ḳhala men raha jo mahv-e-safar
vahi sitara zamin par utarna chahta hai
ḳhabar mili hai mujhe sakinan-e-sahra se
vo ahu-chashm idhar se guzarna chahta hai
ḳhabar bhi hai ki tumhara ‘niyaz’ sho.ala-nava
hudud-e-jism se bahar bikharna chahta hai
Leave a Reply