Moosa Raza
kabhi hudud se bahar kabhi vo had men raha
mira yaqin hamesha guman ki zad men raha
hai bahr-o-bar men ravan haal mera sayyara
gahe vo burj-e-samak men gahe asad men raha
usi ke dam se rahi zindagi ki rangini
junun ka kaif jo paimana-e-ḳhirad men raha
use nasib kahan lazzat-e-sabil-e-safar
vo karvan jo nigahbani-e-rasad men raha
use kahan se milegi tire makan men amaan
tamam-umr jau paikar-e-nek-o-bad men raha
‘raza’ jo guzra to kuchh raushni bhi chhoḌ gaya
vo ik sharar tha jo andesha-e-abad men raha
Leave a Reply