bas saliqe se zara barbad hona hai tumhen
is ḳharabe men agar abad hona hai tumhen
ashna tahzib-e-ḳhamoshi se hona shart hai
dosto gar vaqa.i fariyad hona hai tumhen
vasl ki saa.at tumhare qurb se mujh par khula
ik na ik din hijr ki mi.ad hona hai tumhen
ishq karte vaqt mere zehn men hargiz na tha
sha.eri men is tarah ijad hona hai tumhen
main ḳhuda ke faisle se ḳhush huun ye bhi lutf hai
meri na-ta.amir ki buniyad hona hai tumhen
Leave a Reply