Ali Qaisar
vo koi jadui taḳhliq nazar aati hai
duur se bhi mujhe nazdik nazar aati hai
jis se khilta hai bayaban men gulon ka mausam
husn-e-janan men vo tahrik nazar aati hai
hai mohabbat men ujala hi ujala lekin
ye gupha duur se tarik nazar aati hai
aap kyon hijr ke topic pe pareshan ho ji
kya kahin par koi tashkik nazar aati hai
nazm ho ya ho ghazal ya koi pyari tasvir
nasl-e-gauhar hi ki taḳhliq nazar aati hai
aj-kal main bhi pareshan huun mire paper hain
aj-kal vo bhi bahut weak nazar aati hai
haath phaila.un to aata hai nazar haal mira
haath bandhun to mujhe bhiik nazar aati hai
aur ab kuchh bhi nahin Thiik se dikhta mujh ko
yaar lekin tu mujhe Thiik nazar aati hai
Leave a Reply