P P Srivastava Rind
niim ke patton ka zaḳhmon ko dhuan de dijiye
phir miri ankhon ko pahre-dariyan de dijiye
ho sake to ye navazish ham faqiron par karen
bujhte rangon ka hamen ye asman de dijiye
shab-paraston ko bhi taskin-e-ana mil ja.egi
un ka haq hai un ko shab-bedariyan de dijiye
shaḳh par kanTon ko pairahan badalne ke liye
mausamon ko shabnami be-samtiyan de dijiye
be-hisi ka ḳhushk sa sahra hai ankhon men miri
dhul-e-manzar se to kuchh tughyaniyan de dijiye
dhundalke to nauha-ḳhvani men bahut masruf hain
raat zaḳhmi hai use baisakhiyan de dijiye
arizi mausam ko bhi ehsas-e-mahrumi na ho
ghar ke sannaTon ko ehsas-e-ziyan de dijiye
dhuup men thoḌi si gunja.ish nikal aa.e to ‘rind’
ek muTThi chhanv ka hi sa.eban de dijiye
Leave a Reply