Meer Taqi Meer
amiron tak rasai ho chuki bas
miri bakht-azmai ho chuki bas
bahar ab ke bhi jo guzri qafas men
to phir apni rihai ho chuki bas
kahan tak us se qissa qaziya har shab
bahut baham ladai ho chuki bas
na aaya vo mire jaate jahan se
yahin tak ashnai ho chuki bas
laga hai hausla bhi karne tangi
ghamon ki ab samai ho chuki bas
barabar khaak ke to kar dikhaya
falak bas be-adai ho chuki bas
dani ke paas kuchh rahti hai daulat
hamare haath aai ho chuki bas
dikha us but ko phir bhi ya khudaya
tiri qudrat-numai ho chuki bas
sharar ki si hai chashmak fursat-e-umr
jahan de tuk dikhai ho chuki bas
gale men gervi kafani hai ab ‘mir’
tumhari mirzai ho chuki bas
Leave a Reply