Rashid Anwar Rashid
bahut udaas hai mah-e-tamam kis ke liye
ruki hui hai munDeron pe shaam kis ke liye
bhula ke ḳhud ko chalo gahri niind sote hain
agar karen bhi to ninden haram kis ke liye
ki is dayar men kaun aaya hai jo aa.ega
hamen batao ki ye ehtimam kis ke liye
unhen bhi kaash kisi roz ye pata to chale
bane hain shauq se ham bhi ghulam kis ke liye
vo koi aur nahin hai to ek baat bata
chhalak rahe hain nigahon ke jaam kis ke liye
Leave a Reply