Zakauddin Shayan
siyah bistar paḌe hain sub.h-e-nazzara utar aa.e
ki shab ko ziina ziina koi mah-para utar aa.e
savar-e-gham ravan hain khol do ishrat-kadon ke dar
ḳhabar kya kaun andhere ka thaka-hara utar aa.e
ajab Dar hai maTili vadiyan uupar ko takti hain
kisi tufan ki surat na tayyara utar aa.e
damak uTThe miri sub.hon men vo hansta hua chehra
miri raton men un ankhon ka gham saara utar aa.e
haqiqat ki sharar-angeziyon men guftugu us ki
zaban kholun to jaise lab pe angara utar aa.e
daraḳhshan bazuon ki halqa halqa surḳh si maujen
hamare ḳhuun se sho.alon ka favvara utar aa.e
tamashe bahr ki sat.hon pe maujon ke bhi kya kam hain
ki uupar se havaon ki ada-kara utar aa.e
Leave a Reply