Poet
bad amal karte ho aur nek jaza chahte ho
dil men socho to ki kya karte ho kya chahte ho
us ke bandon ka satana hai nihayat hi bura
un ko aram do gar apna bhala chahte ho
na-ḳhuda-tarshon ko jab tum ne kiya apna nadim
hua ma.alum ki tum apna bura chahte ho
bad-ma.ashon se to karvate ho aalam ko tabah
us pe ye lutf hai abad hua chahte ho
hajaten aur gharibon ki to karvate ho band
aur hajat ko tum apni rava chahte ho
saare aalam ko to rulvate ho aur is ke evaz
ye tamasha hai ki tum aap hansa chahte ho
baat kyun-kar bane zahir men to farmate ho lutf
qatl batin men gharibon ko kiya chahte ho
‘aish’ kar arz yahi un se ki bas tauba karo
maraz-e-gham se agar apni shifa chahte ho
Leave a Reply