Mujhe Is Shahr Ki Aab-O-Hawa Achchhi Nahin Lagti

mujhe is shahr ki ab-o-hava achchhi nahin lagti

musalsal ḳhud-farebi ki qaba achchhi nahin lagti

ilahi ye maraz kaisa laga mujh ko na jaane kyon

dua achchhi nahin lagti dava achchhi nahin lagti

ḳhushi ki bhi ḳhabar se ab to dilchaspi nahin mujh ko

ki ab ai zindagi tujh se vafa achchhi nahin lagti

jahan ke samne ham ko na tum pahchan paate ho

tumhari ye ada ham ko zara achchhi nahin lagti

main aisi bazm-e-shor-o-ghul se nikla huun ki ab mujh ko

koi aahaT kisi ki bhi sada achchhi nahin lagti

main kahna chahta huun un se lekin kah nahin paata

ki mujh ko un ki ḳhu un ki ana achchhi nahin lagti

dua.en aur fariyaden falak se lauT aati hain

ḳhuda ko ghaliban meri raza achchhi nahin lagti

tu kyon kahta hai sajdon men mujhe rab umr lambi de

mujhe tere labon par ye dua achchhi nahin lagti

kabhi teri sabhi nadaniyon par jaan dete the

magar ab to tiri koi ḳhata achchhi nahin lagti

mujhe tum chhoḌ do is haal par ye haal achchha hai

paḌi hai dard ki ḳhu ab shifa achchhi nahin lagti

ujalon se to ab ‘afrang’ kya ummid kijega

magar ye tirgi ham se ḳhafa achchhi nahin lagti