Poet
tez ho jaa.en hava.en to bagula ho ja.un
ghumte ghumte ham-raqba-e-sahra ho ja.un
ḳhud-kalami miri aadat nahin majburi hai
yuun na masruf rahun main to akela ho ja.un
dusra paanv uThane ki zarurat na paḌe
aur main fateh-e-nahid-o-surayya ho ja.un
band ankhon se na kar mashq-e-tasavvur din-rat
ki hamesha ke liye jaan main tera ho ja.un
ye tiri gul-badani ye tiri kam-pairahani
sair-chashmi se kahin aur na pyasa ho ja.un
ik sira hai magar aata nahin hathon men ‘zubair’
jis bahane se main be-gana-e-duniya ho ja.un
Leave a Reply