Ahmad Shanas
imroz ki kashti ko dubone ke liye huun
kal aur kisi rang men hone ke liye huun
tu bhi hai faqat apni shahadat ka talabgar
main bhi to isi dard men rone ke liye huun
jiine ka taqaza mujhe marne nahin deta
mar kar bhi samajhta huun ki hone ke liye huun
hathon men mire chand bhi lagta hai khilauna
khvabon men falak rang samone ke liye huun
har baar ye shishe ka badan tuut gaya hai
har baar nae ek khilaune ke liye huun
pardes ki raton men bahut jaag chuka main
ab ghar ka sukun odh ke sone ke liye huun
siine men koi zakhm ki khulne ke liye hai
aankhon men koi ashk ki rone ke liye huun
saada si koi baat nahin bhuuk shikam ki
iman bhi roti men samone ke liye huun
vo dasht-o-bayaban men iz.har ka khvahan
main apne chaman-zar men rone ke liye huun
gharon ka safar hai ki mukammal nahin hota
main apni khabar aap hi dhone ke liye huun
suraj ko nikalne men zara der hai ‘ahmad’
phir zaat ka har rang main khone ke liye huun
Leave a Reply