tasvir-e-zindagi men naya rang bhar ga.e
vo hadse jo dil pe hamare guzar ga.e
duniya se haT ke ik na.i duniya bana saken
kuchh ahl-e-arzu isi hasrat men mar ga.e
nikla jo qafile se na.i justuju liye
kuchh duur saath saath mire rahbar ga.e
nairangiyan chaman ki pasheman ho ga.iin
ruḳh par kisi ke aaj jo gesu bikhar ga.e
phuTi jo us jabin se inayat ki ik kiran
maghmum arzuon ke chehre nikhar ga.e
har shai se be-niyaz rahe jin men husn o ishq
ai zindagi bata ki vo lamhe kidhar ga.e
ai ‘naqsh’ kar raha tha jinhen gharq naḳhuda
tufan ke zor se vo safine ubhar ga.e
Leave a Reply