Shaz Tamkanat
hava ke dosh pe raqs-e-sahab jaisa tha
tira vajud haqiqat men ḳhvab jaisa tha
dam-e-vida.a samundar bichha raha tha koi
tamam-shahr hi chashm-e-pur-ab jaisa tha
miri nigah men rangon ki dhuup chhanv si thi
hujum-e-gul men vo kya tha gulab jaisa tha
hamari pyaas ne vo bhi nazara dekh liya
ravan-davan koi dariya sarab jaisa tha
jhuki nigah vo kam kam suḳhan dam-e-iqrar
vo harf harf tira intiḳhab jaisa tha
mujhe to sair-e-jahan sair-e-bazgasht hui
tira jahan dil-e-ḳhana-ḳharab jaisa tha
shikasta ḳhvabon ke TukḌon ko joḌte the ham
vo din ajiib tha roz-e-hisab jaisa tha
hamen baratne men kuchh ehtiyat lazim thi
dilon ka haal shikasta kitab jaisa tha
main ‘shaz’ kya kahun kya raushni thi rahon men
vo aftab na tha aftab jaisa tha
Leave a Reply