Krishn Bihari Noor
us ki dhun men har taraf bhaga kiya dauḌa kiya
ek buund amrit ki ḳhatir main samundar pi gaya
ik taraf qanun hai aur ik taraf insan hai
ḳhatm hota hi nahin jurm-o-saza ka silsila
avval-o-aḳhir ke kuchh auraq milte hi nahin
hai kitab-e-zindagi be-ibtida be-intiha
phuul men rangat bhi thi ḳhushbu bhi thi aur husn bhi
us ne avazen to diin lekin kahan main sun saka
main to chhoTa huun jhuka dunga kabhi bhi apna sar
sab baḌe ye tai to kar len kaun hai sab se baḌa
jaise an-dekhe ujale ki koi divar ho
band ho jaata hai kuchh duuri pe har ik rasta
husn-o-ulfat donon hain ab ek sat.h par magar
a.ina-dar-a.ina bas a.ina-dar-a.ina
jab na mujh se ban saki us tak rasa.i ki sabil
ek din main ḳhud hi apne raste se haT gaya
zindabad ai dil mire main bhi huun tujh se muttafiq
pyaar sachcha hai to phir kaisi vafa kaisi jafa
haan magar tasdiq men umren guzar jaati hain ‘nur’
kuchh na kuchh rahta hai sab ko apni manzil ka pata
Leave a Reply