KHwab Se Parda Karo Dekho Mat

ḳhvāb se parda karo dekho mat

ab agar dekh sako dekho mat

girte shahtīroñ ke jañgal haiñ ye shahr

chup raho chalte raho dekho mat

jhuuT sach donoñ hī ā.īne haiñ

us taraf koī na ho dekho mat

husn kyā ek chaman ik kohrām

tez-o-āhista chalo dekho mat

pañkhuḌī ek parat aur parat

kyuuñ bakheḌe meñ paḌho dekho mat

har kalī ek bhañvar ik bādal

khel meñ khel na ho dekho mat

ye purānī ye anokhī ḳhushbū

kuchh din āvāra phiro dekho mat

har taraf dekhne vaalī āñkheñ

un ke saa.e se bacho dekho mat

kam-libāsī ho gila yā isrār

be-ḳhabar jaise raho dekho mat

āfiyat is meñ hai ġhāfil guzro

mat nigāhoñ se giro dekho mat

keñchulī haT ga.ī zinda resham

phir ye kahtā hai haTo dekho mat

dekhte dekhte manzar hai kuchh aur

dhuul āñkhoñ meñ bharo dekho mat

sat.h ke nīche hai kyā jaane kaun

lahr kī lai pe baḌho dekho mat

ek hī jal hai yahāñ māyā-jal

pyaas ke jaal buno dekho mat

Leave a Comment