ishq ko dil men chhupa lete hain kamil kyunkar
un par asan hua karti hai mushkil kyunkar
hadaf-e-navik-e-mizgan-o-kaman abru tha
na tadapta shab-e-furqat dil-e-bismil kyunkar
apne bimar-e-mohabbat ko bhi lete jaao
tum chale jaate ho pahlu men rahe dil kyunkar
sar kata kar tire kuche men yahi dekhunga
surakh-ru hota hai khanjar tira qatil kyunkar
mirat-e-dil ki safai vo kahan paega
aaina hoga rukh-e-yar ke qabil kyunkar
ye tamasha bhi mire dil ko jila kar dekho
shama hasrat se jali bar-sar-e-mahfil kyunkar
bahr-e-ulfat men bhi vahshat thi dil-e-gham-ghin ko
rakhta aghosh men phir daman-e-sahil kyunkar
dekhna lutf dam-e-qatl zara ai qatil
khak-o-khun men hua ghaltan tira bismil kyunkar
zer-e-khanjar mire khuun ne use ud kar thama
us ke panje se chhute daman-e-qatil kyuun kar
dekhna gar ho to aao main dikha duun tum ko
ban gaya shekh-e-haram but-kada-e-dil kyunkar
raz-e-sar-basta ‘jamila’ main kahun kya tujh se
ho gaya mera ye dil arif-e-kamil kyunkar
Leave a Reply