Agar Sunani Hai Har Qadam Par Nai Kahani to Haar Mani

Iftikhar Haidar

agar sunani hai har qadam par na.i kahani to haar maani

fareb khate hue guzarni hai zindagani to haar maani

agar mohabbat tira ravayya hai phir paraya to baaz aaya

agar zamane tiri ravish hai vahi purani to haar maani

ham apna jivan ham apni ḳhushiyan ham apna sab kuchh luTa chuke hain

agar hai phir bhi hamari qismat men ra.igani to haar maani

samajh rahi hai agar mohabbat ko silsila ik himaqaton ka

samajh rahi hai jo ḳhud ko tu is qadar siyani to haar maani

nahin batana jo kis tanasub se jhuuT hai saari dastan men

nahin batana jo duudh kya aur kya hai paani to haar maani

suḳhan ki devi jo mehrban ho nahin rahi ‘iftiḳhar’ ‘haidar’

jo ruk rahi hai qalam ki qirtas par ravani to haar maani