Hawa Ke ruKH Par Charagh-E-Ulfat Ki Lau baDha Kar Chala Gaya Hai

Hasan Rizvi

hava ke ruḳh par charagh-e-ulfat ki lau baḌha kar chala gaya hai

vo ik diye se na jaane kitne diye jala kar chala gaya hai

ham us ki baton ki barishon men har ek mausam men bhigte the

vo apni chahat ke saare manzar hamen dikha kar chala gaya hai

usi ke baare men harf likkhe usi pe ham ne ghazal kahi hai

jo kajli ankhon se mere dil men naqab laga kar chala gaya hai

mata-e-jan bhi usi pe vaari usi ke dam se hai saans jaari

mire badan men vo ḳhushbuon ki hava basa kar chala gaya hai

ye fasl-e-fikr-o-ḳhayal apni usi ke dam se hari-bhari hai

jo kachche koThon ke anganon se dhuan uTha kar chala gaya hai

hamari ankhon men ratjage ki jhaḌi lagi hai usi ghaḌi se

ki jab se koi ghazal apni jhalak dikha kar chala gaya hai

hiran mohabbat ke sabza-zaron men jaane kab chaukḌi bharenge

vo jaate jaate saval aisa ‘hasan’ uTha kar chala gaya hai