Arzoo Lakhnavi
karam un ka ḳhud hai baḌh kar miri hadd-e-iltija se
mujhe su-e-zan nahin hai ki dua karun ḳhuda se
dil-e-mutma.in ki vus.at koi kam hai ma-siva se
mujhe kaahe ki kami hai jo talab karun ḳhuda se
hui ḳhatm gham ki andhi vahi dil ki lau hai ab bhi
yahi sho.ala tha vo sho.ala ki laḌa kiya hava se
kahe kaun use patinga jo hai sho.ale par dhuan sa
tujhe le uḌe hain kitna tire par zara zara se
jo hai sab ka dene vaala main usi ko chahta huun
miri bhiik vo nahin hai ki mile kisi gada se
ye hai qasr-e-zindagani ki habab-e-bahr-e-fani
abhi ban gaya hava se abhi miT gaya hava se
ye ḳhayal ḳhud hai aisa jo ḳhushi bana de gham ko
ki hai ibtida ḳhushi ki mire gham ki intiha se
mira dil raza pe raazi karam us ka josh par hai
jo ab aa ga.i zaban tak to asar gaya dua se
miri laakh minnaton par tiri ik haya hai bhari
koi parda hai vo parda ki hile-Dule hava se
tire pak-baz-e-ulfat nahin harne ke himmat
jo marenge Duub kar bhi to marenge rah ke pyase
kisi dil ki aas yuun bhi kabhi ‘arzu’ na TuuTe
ye kahe bani hai dam par vo kahe miri bala se
Leave a Reply