Zaban Ko Hukm Nigah-E-Karam Ko Pahchane

Ada Jafarey

zaban ko hukm nigah-e-karam ko pahchane

nigah ka jurm ghubar-e-alam ko pahchane

vo ek jaam kahan har kisi ki qismat men

vo ek zarf ki eajaz-e-sam ko pahchane

mata-e-dard parakhna to bas ki baat nahin

jo tujh ko dekh ke aae vo ham ko pahchane

vo dil jo khaak hue aaj tak dhadakte hain

rah-e-vafa tire mojiz-raqam ko pahchane

sahar se pahle yahan aftab ubhre hain

khulus bandgi-e-chashm-e-nam ko pahchane

ye khud-fareb ujale ye haath haath diye

diye bujhao ki insan gham ko pahchane

kisi khayal ka saaya kisi umiid ki dhuup

koi to aae ki dil kaif-o-kam ko pahchane

hazar kos nigahon se dil ki manzil tak

koi qarib se dekhe to ham ko pahchane

jo ham-safar bhi rahe hain sharik-e-manzil bhi

kuchh ajnabi to na the phir bhi kam ko pahchane

bahut dinon to havaon ka ham ne rukh dekha

bade dinon men mata-e-qalam ko pahchane