ghamon men duubi hui hai har ik khushi meri
ajiib taur se guzri hai zindagi meri
har ek lamha guzarta hai hadse ki tarah
bas ek dard-e-musalsal hai zindagi meri
khayal-o-fikr ne kya kya sanam tarashe the
tamam umr parastish men kat gai meri
mira safina-e-hasti hai aur mauj-e-bala
tamasha dekhti rahti hai bebasi meri
hujum-e-dard men gum ho gai miri avaz
zamane valon ne rudad kab suni meri
miri hayat adhuri rahi tumhare baghair
batao tum ne bhi mahsus ki kami meri
gham-e-hayat ki rudad thi magar ‘mumtaz’
samajh liya use logon ne shairi meri