mohabbat ka ye ruḳh dekha nahin tha
vo yuun badlega ye socha nahin tha
ajab hai sah ke zaḳhm-e-be-vafa.i
ye dil kahta hai vo aisa nahin tha
sabab koi to hai un nafraton ka
main jhuTa tha ki vo sachcha nahin tha
na jaane kyuun mire hisse men aaya
vo dukh qismat men jo likkha nahin tha
bahut tanha.iyan thiin is se pahle
magar itna bhi main tanha nahin tha
chalo kuchh to ghuTan kam ho ga.i hai
bahut din ho ga.e roya nahin tha
kinare par khaḌa vo kah raha hai
samundar is qadar gahra nahin tha
sabhi kuchh hai ‘nadim’ ab paas mere
bas ik vo shaḳhs jo mera nahin tha
Leave a Reply