Nazeer Qaisar
dua ka phuul paḌa rah gaya hai thali men
hava use bhi uḌa de na be-ḳhayali men
vo mujh se maang raha hai mujhe miri ḳhatir
main ḳhud ko Daal na duun kasa-e-savali men
bas ek mauja-e-bad-e-bahar guzri thi
piro ga.i hai mira jism Daali Daali men
bikharta jaata hai kamre men cigareton ka dhuan
paḌa hai ḳhvab koi chaa.e ki pyali men
diye ke samne vo sar jhuka.e baiThi hai
chamak rahi hai miri raat us ki baali men
Leave a Reply