Khulegi Us Nazar Pe Chashm-E-Tar Aahista Aahista

Parveen Shakir

khulegi us nazar pe chashm-e-tar ahista ahista

kiya jaata hai paani men safar ahista ahista

koi zanjir phir vapas vahin par le ke aati hai

kathin ho raah to chhutta hai ghar ahista ahista

badal dena hai rasta ya kahin par baith jaana hai

ki thakta ja raha hai ham-safar ahista ahista

khalish ke saath is dil se na meri jaan nikal jaae

khinche tir-e-shanasai magar ahista ahista

hava se sar-kashi men phuul ka apna ziyan dekha

so jhukta ja raha hai ab ye sar ahista ahista