Khalid Malik Sahil
main apni aankh bhi ḳhvabon se dho nahin paaya
main kaise dunga zamane ko jo nahin paaya
shab-e-firaq thi mausam ajiib tha dil ka
main apne samne baiTha tha ro nahin paaya
miri ḳhata hai ki main ḳhvahishon ke jangal men
koi sitara koi chand bo nahin paaya
hasin phulon se divar-o-dar saja.e the
bas ek barg-e-dil aasa piro nahin paaya
chamak rahe the andhere men soch ke jugnu
main apni yaad ke ḳheme men so nahin paaya
nahin hai harf-e-tasalli magar kahun ‘sahil’
nahin jo paaya kahin yaar to nahin paaya
Leave a Reply