dil Ke dard Ke Kam Hone Ka Tanha Kuchh Saman Hua

Raziya Faseeh Ahmad

dil ke dard ke kam hone ka tanha kuchh saman hua

ham bhi ab kai din ji lenge is ka bhi imkan hua

ek diye ki lau ne saara shahr jala kar khaak kiya

ek hava ka jhonka ban kar andhi aur tufan hua

arzuon ki nichi saans ne us dar par dastak di

aur junun ka ik ik lamha mere ghar mehman hua

vaqt ka katna us se puchho hijr men jis ki guzri ho

ek ik lamha ek sadi tha kab ham par asan hua

koi kisi ka miit nahin hai duniya kahti aai hai

ham ne jis ko apna jaana vaqt pe vo anjan hua

ishq udanon ka dushman hai kya us ko maalum na tha

dil ka panchhi qaid men aa kar kyuun itna hairan hua

tanha un ki gul-afshani kuchh na puchho kaisi hai

jab bhi hazrat-e-vaiz bole sab ka ji halkan hua