Poet
zahid dar-e-masjid pe ḳharabat ki tu ne
ji bhi yunhi chahe tha karamat ki tu ne
jaane de bas ab yaar ki ye bhi nahin kuchh kam
a.amal ki dil ke jo mukafat ki tu ne
idhar to main nalan huun udhar ghair na jaane
ab kis se miri jaan mulaqat ki tu ne
allah-ri mohabbat tiri ta.alim ki jo baat
dushvar thi mujh par so musavat ki tu ne
‘qa.em’ rah-e-pur-ḳhauf hai aur duur hai manzil
kab pahunchega zalim jo yahin raat ki tu ne
Leave a Reply