Sinchi Hain Maine Kitni Zaminen Nai Nai

Khalid Iqbal Yasir

sinchi hain main ne kitni zaminen na.i na.i

phuTin suḳhan ke peḌ se shaḳhen na.i na.i

pahle bhi kam nahin the nigah-dar damdame

uThti hi ja rahi hain fasilen na.i na.i

garche hain azmuda shah-o-qazi-o-vazir

bandhi hain un se phir bhi ummiden na.i na.i

maidan men faisle hua karte the tegh par

ab aur aur paintare chalen na.i na.i

rasm-o-rivaj aur hain ab did-o-id ke

raten vahi ghaneri hain ghaten na.i na.i

yunhi nahin badal rahin she.ri latafaten

sikhi hain mah-ruḳhon ne ada.en na.i na.i

momin bhi taaza taaza hue varid-e-bahisht

ghilman bhi na.e na.e huren na.i na.i

dekha jo us kure ko nikal kar madar se

paida huiin bayan men ramzen na.i na.i

paida karun mutabaqat in se main kis tarah

yasir naya zamana hai sochen na.i na.i