Hijrat

Aftab Shamsi

bahut dinon se mujhe intizar hai lekin

tumhare shahr se koi yahan nahin aaya

main sochta huun to bas ye ki ab tumhari shakl

guzarte vaqt ke hathon badal gai hogi

khamida zulfon ki kaali ghata men ab shayad

safed balon ki taadad badh gai ho gi

tumhare gaal pe jo ek til chamakta tha

pata nahin vo chamak is men ab bhi baaqi hai

tumhari ankhon men ik chandni si raushan thi

pata nahin vo damak is men ab bhi baaqi hai

tumhari baton men phulon ki si mahak thi jo

pata nahin vo mahak ab bhi sunne vaale ko

masham-e-jan men utar kar nihal karti hai

tumhare mathe pe jo ek chand raushan tha

mujhe guman hai vo chand bujh gaya hoga

main sochta huun to bas is qadar ki ab tum ne

purane qisse ko dil se bhula diya hoga

yaqin mujhe bhi hai ab mil na paenge ham tum

magar ye rishta-e-dil kas tarah se toda jaae

fasana jo ki mukammal na ho saka us ko

kahan pe khatm kiya jaae kaise moda jaae

bahut dinon se mujhe intizar hai lekin

tumhare shahr se koi yahan nahin aaya