mausam-e-gul na baharon ka suḳhan yaad aa.e
mujh ko ai maah tire ruḳh ki phaban yaad aa.e
sair-e-gulshan ke liye vo na kahin nikle hon
kis liye aaj mujhe sarv-o-saman yaad aa.e
jab shafaq dekhun to yaad aate hain aariz us ke
chand ko dekhte hi us ka badan yaad aa.e
bujh gaya dil bhi mire ghar ke charaghon ki tarah
ḳhaak aise men koi ghuncha-dahan yaad aa.e
zindagi aa.e jo phulon ka tabassum dekhun
ḳhaak uḌti hui dekhun to kafan yaad aa.e
phir tira lauT ke jaane ka saman yaad aaya
phir mujhe silsila-e-ranj-o-mehan yaad aa.e
jab koi rauzan-e-divar nazar se guzre
mujh ko zindan-e-tamanna ki kiran yaad aa.e
tu mire saath hai rakhti hai mira itna ḳhayal
ai gharib-ul-vatani kaise vatan yaad aa.e
jin se vabasta mira dast-e-ta.alluq tha ‘mujib’
dasht men bharte kulelen vo hiran yaad aa.e
Leave a Reply