Guzre Nahin Aur Guzar Gae Hum

Shaheen Abbas

guzre nahin aur guzar ga.e ham

is bhiiḌ ka kaam kar ga.e ham

ye sahn gavah hai hamara

is ghar men bhi dar-ba-dar ga.e ham

daryaft ko zaḳhm ki chale the

tariḳh ki dhaar par ga.e ham

is baat pe ab ulajh rahe hain

baaqi the to phir kidhar ga.e ham

tasvir se bahar aa.e kuchh der

ghar bhar ko udaas kar ga.e ham

varna ye zamin miT chali thi

bar-vaqt idhar udhar ga.e ham

ḳhali the aur is qadar the ḳhali

bas ek nigah se bhar ga.e ham

the kaun-o-makan makan se bahar

bahar kisi shor par ga.e ham