Akhtar Muslimi
mire vaste jahan men koi dilkashi nahin hai
ki tire baghair jiina koi zindagi nahin hai
tiri zaat ke alava mujhe aur chahiye kya
tu agar hai saath mere mujhe kuchh kami nahin hai
vo nazar nazar nahin hai na ho jis men aks tera
koi dil hai vo bhi jis men gham-e-ashiqi nahin hai
koi vasta nahin hai jise dard-e-digaran se
vo hai aadmi ka paikar magar aadmi nahin hai
mire dosto na dekho mujhe chashm-e-ḳhashmagin se
ki rahin-e-bada-noshi miri be-ḳhudi nahin hai
mire dil ke daagh tu hi zara aur lau baḌha de
shab-e-gham hai tiira tiira kahin raushni nahin hai
miri baat sun ke ‘aḳhtar’ suni an-suni na kar do
ye hadis-e-jan-o-dil he niri sha.iri nahin hai
Leave a Reply