ret qabiz thi bahut ḳhamosh lagti thi nadi
paar karte vaqt ye jaana ki gahri thi nadi
jis jagah ab hai ghani abadiyon ka silsila
kal usi qasbe ke bichon-bich bahti thi nadi
ek haibatnak manzar dil ko dahlata hua
rasta apna achanak phir se badli thi nadi
us ke andar ki ḳhamoshi men ghazab ka raaz tha
apne ik maḳhsus lai men gungunati thi nadi
mil ke lahron se bhi sangam ko tarasti hi rahi
is safar men aisa lagta hai akeli thi nadi
dekh qadmon ki thakan vo rokti apna bahao
aur mere ik ishare par hi chalti thi nadi
ye bharam tha so rahi hai vo bhanvar-aghosh men
Dubne ki aa ga.i naubat ki jaagi thi nadi
ab baḌi ho kar samundar ki tarah lagne lagi
chand barson pahle dekha tha to chhoTi thi nadi
pul shikasta tha magar sayyah to be-ḳhauf the
garmiyon ke din the charon samt sukhi thi nadi
Leave a Reply