Zara Si choT Lagi Thi Ki Chalna Bhul Gae

Haseeb Soz

zara si choT lagi thi ki chalna bhuul ga.e

sharif log the ghar se nikalna bhuul ga.e

tiri umiid pe shayad na ab khare utren

ham itni baar bujhe hain ki jalna bhuul ga.e

tumhen to ilm tha basti ke log kaise hain

tum is ke ba.ad bhi kapḌe badalna bhuul ga.e

hamen to chand sitaron ko rusva karna tha

so jan-bujh ke ik roz Dhalna bhuul ga.e

‘hasib’-soz jo rassi ke pul pe chalte the

paḌa vo vaqt ki saḌkon pe chalna bhuul ga.e