havas-nasib nazar ko kahin qarar nahin
main muntazir huun magar tera intizar nahin
hamin se rang-e-gulistan hamin se rang-e-bahar
hamin ko nazm-e-gulistan pe ikhtiyar nahin
abhi na chhed mohabbat ke giit ai mutrib
abhi hayat ka mahaul khush-gavar nahin
tumhare ahd-e-vafa ko main ahd kya samjhun
mujhe khud apni mohabbat pe e’tibar nahin
na jaane kitne gile is men muztarib hain nadim
vo ek dil jo kisi ka gila-guzar nahin
gurez ka nahin qaail hayat se lekin
jo sach kahun ki mujhe maut nagavar nahin
ye kis maqam pe pahuncha diya zamane ne
ki ab hayat pe tera bhi ikhtiyar nahin
Leave a Reply