Ye suKHan Jo Meri Zaban Pe Hai Ye suKHan Hai Us Ka Kaha Hua

Mohsin Zaidi

ye suḳhan jo meri zaban pe hai ye suḳhan hai us ka kaha hua

ye bayan jo hai mire naam se ye bayan hai us ka likha hua

vahi maili maili si chandni vahi dhundli dhundli si raushni

ye charagh koi charagh hai na jala hua na bujha hua

vahi ek yaad kiran kiran miri zindagi men hai zau-fagan

vahi ek chehra chaman chaman sar-e-dasht-e-jan hai khila hua

sar-e-rah kuchh na pata chala vo kahan gaya vo kidhar gaya

kahin naqsh-e-pa tha bana hua kahin naqsh-e-pa tha miTa hua

karun doston ko main nazr kya mire paas dam-o-diram kahan

vo jo dushmanon ka hisab tha vo to naqd-e-jan se ada hua

na kisi ki yaad ka naqsh hai na kisi ke ruḳh ka ye aks hai

ye na koi harf na lafz hai sar-e-ḳhak kya hai likha hua

mujhe ‘mohsin’ is ka gila nahin mujhe mal-o-zar jo mila nahin

jo hunar suḳhan ka mujhe mila vo kahan sabhi ko ata hua