Nasira Zuberi
safar ka aur koi silsila nikalenge
bhaTak ga.e to naya rasta nikalenge
qarib aane lagegi jo vasl ki manzil
ham apne biich koi fasla nikalenge
sameT kar kisi kone men gaThḌiyan gham ki
na.i ḳhushi ke liye ham jagah nikalenge
banenge ishq-e-adalat men ham vakil tire
purani baat men nukta naya nikalenge
rahe jo umr ki puuja ke ba.ad bhi patthar
dilon se ham vo sabhi devta nikalenge
tiri jafa men mila kar sitam zamane ke
sharab-e-gham ka ajab za.iqa nikalenge
hamen ḳhamosh kiya ja.ega sada ke liye
agar zaban se koi sada nikalenge
bharegi niind jo in be-qarar ankhon se
ham ek umr ka ye rat-jaga nikalenge
Leave a Reply