dariya duur nahin aur pyasa rah sakta huun
us se mile baghair bhi zinda rah sakta huun
us ki be-taufiq mohabbat ke jangal men
aadha gum ho kar bhi aadha rah sakta huun
kaisa rahta huun mat puchho shahr men us ke
vaisa hi rahta huun jaisa rah sakta huun
tanha rahne men bhi koi uzr nahin hai
lekin us ke saath hi tanha rah sakta huun
vo bhi daman chhodne ko tayyar nahin hai
main bhi abhi is shakh se uljha rah sakta huun
kuchh mujh ko khud bhi andaza hona chahiye
kitna zaae ho kar kitna rah sakta huun
jis halat se nikal aaya huun koshish karke
is men vo chahe to dobara rah sakta huun
ek anokhe khvab ke andar sote jagte
rahta huun main aur hamesha rah sakta huun
jitne fasle par rakhta hai ‘zafar’ vo mujh ko
rah bhi sakta huun lekin kya rah sakta huun
Leave a Reply