Sufi

Soch Di Hai Jawab Bhi De

soch di hai javab bhi de

kuchh to yarab hisab bhi de

qatra qatra sharab barse

thoda thoda azaab bhi de

chahaton ke to silsile hain

mausamon ka shabab bhi de

ik kinara hai dusra bhi

paniyon men habab bhi de

jis ke kante bhi mujh ko chumen

koi aisa gulab bhi de

dhuup hansti hai vahime bhi

tirgi de sarab bhi de

aag basti ka rahne vaala

rang-e-gardish-e-sahab bhi de

lamhe-bhar men hazar khvahish

banda-parvar javab bhi de

mohabbaton ka azaab jhelun

nafraton ka savab bhi de

tera mera hisab kaisa

khvab huun aur khvab bhi de

kun to mera vajud hai huun

lafz utren khitab bhi de

main payambar nahin huun tauba

aankh di hai kitab bhi de

main to apne tavaf men huun

rah-e-khana-kharab bhi de

More Poems

Leave a Comment