jo dil mira nahin mujhe us dil se kya gharaz
chalni na ho jo raah to manzil se kya gharaz
dubunga gar hai mere muqaddar men dubna
ghavvas-e-bahr-e-ishq ko sahil se kya gharaz
vo dil ko dekhta hai na aamal-e-zahiri
laila ke khvast-gar ko mahmil se kya gharaz
sunta hai kaun ashiqon ki ah-o-zariyan
gosh-e-chaman ko shor-e-anadil se kya gharaz
ham us ke shefta hain raqibon se vasta
gul se gharaz hai fauj-e-anadil se kya gharaz
marta huun aur ja nahin sakta su-e-adam
mujh na-tavan ko tauq-o-salasil se kya gharaz
kyuun dar-pai-e-talash hain ahbab-o-aqraba
‘parvin’ shahid-e-naz ko qatil se kya gharaz
Leave a Reply