Na Sahi Kuchh Magar Itna to Kiya Karte The

Shahzad Ahmad

na sahi kuchh magar itna to kiya karte the

vo mujhe dekh ke pahchan liya karte the

aḳhir-e-kar hue teri raza ke paband

ham ki har baat pe israr kiya karte the

ḳhaak hain ab tiri galiyon ki vo izzat vaale

jo tire shahr ka paani na piya karte the

ab to insan ki azmat bhi koi chiiz nahin

log patthar ko ḳhuda maan liya karte the

dosto ab mujhe gardan-zadani kahte ho

tum vahi ho ki mire zaḳhm siya karte the

ham jo dastak kabhi dete the saba ki manind

aap darvaza-e-dil khol diya karte the

ab to ‘shahzad’ sitaron pe lagi hain nazren

kabhi ham log bhi miTTi men jiya karte the