Razi Akhtar Shauq
ḳhvabon ki ik bhiiḌ lagi hai jism bechara niind men hai
aadha chehra niind se bahar aadha chehra niind men hai
ik ijlas tha divanon ka jis ki ye rudad bani!
sadiyon se bimar hai duniya aur masiha niind men hai
ahan-paikar avazon par ham ne jinhen tasḳhir kiya
sote sote chaunk uThte hain aisa dhaḌka niind men hai
haft-aflak ne dastak de kar puchha tha kis haal men ho
ik darvesh ne baḌh ke sada di ye sayyara niind men hai
pal bhar men sho.ala bhaḌkega shahr khanDar ho ja.enge
jalti sham.en haath men le kar ruh-e-zamana niind men hai
jaag rahi hai ruh-e-ahan ḳhvab men hai insan ka zamir
bedari ki sau lahren hain phir bhi ye duniya niind men hai
uTThega aur lamha-bhar men hashr bapa ho ja.ega
har lamha aisa lagta hai koi fitna niind men hai
shahr-panah ki divaron par ik duzdana aahaT hai
aur main us ko dekh raha huun shahr to saara niind men hai
Leave a Reply