siine men charagh jal raha hai
mathe se lahu ubal raha hai
honTon pe chaman khile hue hain
ankhon se dhuan nikal raha hai
paikar pe uge hue hain kanTe
ehsas ka peḌ phal raha hai
batin men bapa hai ek tufan
dariya hai ki ruḳh badal raha hai
kya vaqt paḌa hai ai gham-e-jan
ḳhud apna vajud khal raha hai
main jis ki talash ko chala tha
vo shaḳhs to saath chal raha hai
tanha huun ‘jalil’ is nagar men
maqtal men charagh jal raha hai
Leave a Reply