har koi us ka kharidar hua chahta hai
garm phir husn ka bazar hua chahta hai
dekh lena gham-e-maashuq men kudhte kudhte
kuchh na kuchh ab mujhe azar hua chahta hai
aankh lalchai hui padti hai jis par meri
ishq us par mira izhar hua chahta hai
kah do us parda-nashin se tiri khatir koi
aaj rusva sar-e-bazar hua chahta hai
paan kha kha ke lab-e-bam pe vo aane laga
khuun hamara pas-e-divar hua chahta hai
kucha-e-yar men jaata hai abas tu ‘ghafil’
kyuun musibat men giraftar hua chahta hai
Leave a Reply